మరో విమానం మిస్సింగ్..!

అమెరికాలో శుక్రవారం (అమెరికా కాలమానం ప్రకారం గురువారం మధ్యాహ్నం) మరో విమానం మిస్సయింది. అలస్కా మీదుగా ఉనాలక్‌లీట్ నుంచి నోమ్‌కు వెళ్తున్న బేరింగ్‌ ఎయిర్‌ సంస్థకు చెందిన సెస్నా 208బీ గ్రాండ్‌ కారవాన్‌ తప్పిపోయినట్లు తెలుస్తోంది. విమానం మిస్సింగ్ సమయంలో అందులో ఒక పైలట్‌ సహా 9 మంది ప్రయాణికులు ఉన్నట్లు సమాచారం. నార్టోన్‌ సౌండ్‌ ఏరియాలో ఈ ప్రమాదం జరిగినట్లు భావిస్తున్నారు.

టేకాఫ్ అయిన నిమిషాల వ్యవధిలోనే ఏటీసీతో విమానం కమ్యూనికేషన్ కోల్పోయిందని ప్రాథమిక సమాచారం. విమానం రాడార్‎ వ్యవస్థతో సంబంధం కోల్పోవడంతో వెంటనే అధికారులు అలర్ట్ అయ్యారు. అదృశ్యమైన విమానం కోసం గాలింపు చర్యలు చేపట్టారు. అలస్కాలోని ప్రతికూల వాతావరణంగా కారణంగానే విమానం అదృశ్యమైనట్లు అధికారులు అనుమానిస్తున్నారు. వారం రోజుల క్రితం ఫిలడెల్ఫియాలోని షాపింగ్‌మాల్‌ సమీపంలో విమానం కుప్ప కూలి.. ఆరుగురు మృతి చెందారు. అంతకుముందే వాషింగ్టన్‌ డీసీ సమీపంలోని రొనాల్డ్‌ రీగన్‌ జాతీయ విమానాశ్రయం వద్ద ఓ ప్రయాణికుల విమానం ల్యాండ్‌ అవుతుండగా సైనిక హెలికాప్టర్‌ ఢీకొన్న సంగతి తెలిసిందే.