మీ గోళ్ళు సూచించే అనారోగ్య సంకేతాలు..ఇప్పుడే చెక్ చేసుకోండి..

శరీరంలో ఏదైనా పోషకాల లోపం లేదా ఏదైనా వ్యాధి ఉన్న కొన్ని లక్షణాలు ముందుగానే కనిపిస్తాయి. శరీరంలో విటమిన్లు, ఖనిజాల లోపం ఉన్నప్పుడు గోళ్లపై కొన్ని సంకేతాలు ముందుగానే కనిపిస్తాయి. వీటిని ఎట్టి పరిస్థితుల్లో లైట్ తీసుకోకూడదు. శరీరం అనారోగ్యం బారిన పడిందని గోళ్లపై కొన్ని సంకేతాలు మనల్ని హెచ్చరిస్తాయి. 

గోళ్లు తరచుగా విరిగిపోవడం లేదా పగుళ్లు ఏర్పడటం జరుగుతుంటే అది మీ శరీరంలో ఐరన్ లోపాన్ని సూచిస్తుంది. అంతేకాకుండా డీహైడ్రేషన్ లేదా థైరాయిడ్ వంటి సమస్యలు ఉన్నప్పుడు కూడా ఈ సంకేతం ఎక్కువగా కనిపిస్తుంది. ఈ లక్షణం పదే పదే కనిపిస్తే వెంటనే వైద్యుణ్ని సంప్రదించి తగిన పరీక్షలు చేయించుకోవాలి. 

గోళ్లు పసుపు రంగులో కనిపిస్తే, అది ఫంగల్ ఇన్ఫెక్షన్‌కి సంకేతం కావచ్చు. లేదంటే ధూమపానం, మధుమేహం లేదా ఊపిరితిత్తుల వ్యాధి వంటి ఆరోగ్య పరిస్థితికి కూడా సంకేతం కావచ్చు. ఇందుకోసం మంచి పరిశుభ్రతను పాటించడం చాలా ముఖ్యం. అలాగే, యాంటీ ఫంగల్ చికిత్స, విటమిన్ E తీసుకోవడం కూడా గోళ్ల ఆరోగ్యాన్ని మెరుగుపరచడంలో సాయపడతాయి. అంతేకాకుండా గోళ్లు చాలా పసుపు రంగులో ఉంటే రక్తహీనత, కాలేయ వ్యాధి లేదా పోషకాహార లోపానికి సంకేతం కావచ్చు.

గోళ్ళపై కనిపించే చిన్న తెల్లని మచ్చలు సాధారణంగా గాయాల వల్ల సంభవిస్తాయి. ఈ మచ్చలు ఎక్కువ కాలం కొనసాగితే, అవి జింక్ లేదా కాల్షియం లోపానికి సంకేతం కావచ్చు . ఈ లోపాన్ని అధిగమించడానికి, పోషకాలు అధికంగా ఉండే ఆహారాన్ని తీసుకోవాలి.

గోళ్లపై నీలం రంగు ఉంటే అసలు నిర్లక్ష్యం వద్దు. శరీరంలో తగినంత ఆక్సిజన్ లేకపోతే ఇలాంటి లక్షణాలు కనిపిస్తాయి. ఇది సాధారణంగా ఊపిరితిత్తుల వ్యాధి, టీబీ వల్ల వస్తుంది. ఈ లక్షణాలు ఎక్కువ కాలం పాటు కొనసాగితే, వెంటనే వైద్యుడిని సంప్రదించండి.

గోళ్ల కింద గోధుమ లేదా నల్లని గీతలు మెలనోమా అనే తీవ్రమైన చర్మ క్యాన్సర్‌కు సంకేతం. గోళ్లలో ఏదైనా అసాధారణ రంగు మార్పు కనిపిస్తే అస్సలు నిర్లక్ష్యం చేయవద్దు.

గోళ్ల చుట్టూ ఎరుపు లేదా వాపు ఇన్ఫెక్షన్.. లూపస్ లేదా ఇతర ఆటో ఇమ్యూన్ వ్యాధుల సంకేతం కావచ్చు. అలాంటి సంకేతాలు కనిపిస్తే ఆలస్యం చేయకుండా వెంటనే వైద్యుడిని సంప్రదించండి.