పాకిస్తాన్ లో పుట్టి భారత ప్రధాని అయ్యారు: మన్మోహన్ సింగ్ చరిత్ర

డాక్టర్ మన్మోహన్ సింగ్, భారతదేశంలో అత్యంత గౌరవనీయమైన ఆర్థిక శాస్త్రజ్ఞులు, భారతదేశ మొదటి సిక్ ప్రధానమంత్రి, దేశ ఆర్థిక వ్యవస్థకు బలమైన మార్పులు తెచ్చారు. విద్యా ప్రతిభతో ప్రారంభమైన ఆయన ప్రయాణం, చారిత్రాత్మక ఆర్థిక సంస్కరణల ద్వారా భారతదేశ ఆర్థిక పురోగతికి ప్రేరణనిచ్చింది.

డాక్టర్ మన్మోహన్ సింగ్ జీవితం
డాక్టర్ మన్మోహన్ సింగ్ భారత ఆర్థికవేత్త మరియు రాజకీయవేత్త. ఆయన 1932 సెప్టెంబర్ 26న, పశ్చిమ పంజాబ్‌లోని గహ్ అనే ప్రదేశంలో (ప్రస్తుతం పాకిస్తాన్‌లో) జన్మించారు. 2004 నుండి 2014 వరకు భారత ప్రధానమంత్రిగా వ్యవహరించారు. భారత ఆర్థిక వ్యవస్థలో ఆయన తెచ్చిన విప్లవాత్మక మార్పులు ఆయనను ప్రత్యేక స్థానంలో నిలిపాయి.

ప్రారంభ జీవితం, విద్య
మన్మోహన్ సింగ్ తన విద్యను పంజాబ్ యూనివర్శిటీలో ప్రారంభించి, 1952లో బిఏ, 1954లో ఆర్థికశాస్త్రంలో ఏంఏ పట్టా పొందారు. తరువాత, 1957లో కెంబ్రిడ్జ్ యూనివర్శిటీ నుండి ఫస్ట్ క్లాస్ ఆనర్స్ పట్టా పొందారు. 1962లో నఫీల్డ్ కాలేజ్, ఆక్స్ఫర్డ్ నుండి డి.ఫిల్. పూర్తిచేశారు. పంజాబ్ యూనివర్శిటీ, ఢిల్లీ స్కూల్ ఆఫ్ ఎకనామిక్స్, మరియు యునైటెడ్ నేషన్స్ ట్రేడ్ అండ్ డెవలప్మెంట్ (UNCTAD) వంటి సంస్థలలో ఆయన అధ్యాపకుడిగా సేవలందించారు.

రాజకీయ జీవితం
1971లో వాణిజ్య మంత్రిత్వ శాఖలో ఆర్థిక సలహాదారుడిగా ఆయన రాజకీయ ప్రయాణం ప్రారంభమైంది. అనతి కాలంలోనే అతి ముఖ్యమైన పదవులు అయిన చీఫ్ ఎకనామిక్ అడ్వైజర్, ఆర్థిక మంత్రిత్వ శాఖ కార్యదర్శిగా ఎదిగారు.

1991 నుండి 1996 వరకు ఆర్థిక మంత్రిగా ఉన్నప్పుడు ఆయన ప్రవేశపెట్టిన ఆర్థిక సంస్కరణలు భారత ఆర్థిక వ్యవస్థను గణనీయంగా అభివృద్ధి చేశాయి.

2004లో భారత జాతీయ కాంగ్రెస్ పార్టీ ఎన్నికల్లో విజయం సాధించగా, సోనియా గాంధీ ఆయనను ప్రధానమంత్రిగా నామినేట్ చేశారు.

ఆయన ప్రభుత్వ హయాంలో 7.7% సగటు ఆర్థిక వృద్ధి సాధించి, పేదరికం తగ్గింపులో కీలక పాత్ర పోషించారు. 2009లో ఆయన తిరిగి ఎన్నికైనప్పటికీ, ద్రవ్యోల్బణం మరియు అవినీతి వలన ప్రభుత్వం ప్రతిష్ట తగ్గింది.